不厭其煩講多次，日圓低水，遊日本真係好抵！遊日本，想繼續手機跟身「保持在線」玩 Facebook 搵地圖搵餐廳，咁你就一定要知日本有乜上網方法。有收費，有免費，以下兩種都話曬你知！
【免費】任用 2 星期夠未先？
日本政府跟多個機構最新推出「Travel Japan Wi-Fi」服務，先講一埋數字：基本用戶可接入分佈全國各地的 60,000 個 Wi-Fi 熱點、一經接入可使用 2 星期、高級用戶更可享用超過 20 萬個 Wi-Fi 熱點，夠正未？老實講，俾錢去旅行，大部分時間都會去觀光或「血拚」購物，好少話會坐定定在街變「低頭族」，頂多都係搵地圖、優惠等實用資訊，又或是上 Facebook 上載相片之類，對於呢批旅客而言，其實免費服務都頗足夠。
「Travel Japan Wi-Fi」之外，連地鐵站都有免費 Wi-Fi 使用。東京地鐵有 143 個站，於 12 月 1 日起提供免費 Wi-Fi 服務，乘客每次連接時間最長達 3 小時。大家常到的新宿、築地市場、銀座、池袋及上野等站，都被納入服務範圍之內。
【東京地鐵 143 站設免費 Wi-Fi】>>> 按此即睇
【日本 20 萬個 Wi-Fi 熱點任用】>>> 按此即睇
【收費】幾十蚊任玩幾日
免費服務始終有限制，一來地點受限，二來使用時間亦都受限（雖然任用 2 星期應該都好足夠）。咁如果我想豪一點，俾錢去日本上網又如何？簡單，主要有兩種方案：預先租蛋（即 Pocket Wi-Fi）及 Pre-paid SIM 卡。再單刀直入講價錢，如果 5 人同行去日本玩 5 日，以 HK$70 日租 4G Pocket Wi-Fi 計，平均每人 HK$70，係咪經濟實惠先？
Pre-paid SIM 卡又如何？又係單刀直入講價錢，以 So-net LTE Pre-paid SIM 卡為例，1GB（30 天）流量版本定價 3,000 日圓（即約 HK$198），如果去幾日旅行，平均又係幾十蚊一日。不過，Pre-paid SIM 卡就要插入電話用，雖然可以再藉電話分享 Wi-Fi，但如果多人同行，始終係租蛋較方便。
【So-net 4G LTE 儲值卡流量倍增】>>> 按此即睇
【旅行租蛋定買 Sim 卡？】>>> 按此即睇
原文: Ezone